ماتت عنز امي منيره

اليوم ماتت عنز امي منيره
وكتبت فيها الفيه ستون بيتاً كل بيت ينطح بيت رثاء فيكي ياعنز امي منيره



الالف ابتدي باسم الواحد العليم... خالق الانس والبهم في خلقه حكيم
سبحانه اللي يشفي السقيم ... طامن سبع ورافع سبع سماوات

الباء بقلبي حب مات البارح... عفت النوم على الدواشق والمطارح
متشقلب البال وفكري سارح... على وليف مات في لحظات

التاء ترى قلبي عليك حزين ... رحتي وانا خابر انك ماتجين
الموت مايعرف لانحيف ولاسمين... ولا عنز لوهي رفيعت مقامات

الثاء ثواليل ظهري تشهد بحبك... وتذكر ودادي وشوقي بقربك
وتقول انسى الوليف واذكر ربك ... العمر فاني وياكثر الازمات

الجيم جاني البارح خبر موتتها ... توجعت تكنبست من حرورتها
الطبيب تكسمر من رفستها ... قال نعنبو من يعالج العنزات

الحاء حالي عقب فرقاها كسيره ... هذي حبيبتي عنز امي منيره
الله العالم بالخافي والسريره ... ارحم بحالي ياكريم العطايات

الخاء خايف على قلبي بحب جديد ... يبقى لي ونبقا بعمر مديد
وشلون ابمسح الحب الاكيد ... الله يرحمك ياقليل العثرات

الدال دلاله علي زايد حده ... وليفي من قدي ومن قده
رحت الدرعيه قالو في جده ... تلقاها مربوطه في عمود اللمبات

الذال ذيب الفلا مايسوى عيونها ... عنز امي منيره وانا مجنونها
هالقصيده بالسامري لاتشيلونها ... تتغنى بالاوبرا وباحلى الموسيقات

الراء رماني الوقت في دهاليز الاحلام ... عقب فرقاها ماذقت المنام
بكيت وتلعب في راسي الاوهام ... ابلقا بديله من البشر والبريات ؟

الزاء زماني وان ماطاوعني طاوعته ... وان ماشقلني عن الحزن ماشقلته
وليل الاحزان من الليله سهرته ... اثر فرقى الغاليه عظيم الويلات

السين سكين الفراق في قلبي طعينه ... والفرح والسعاده عن قلبي سجينه
اثر السكين كانت في يمينه ... طعنها فيني يوم وافته المنيات

الشين شكيت للحزن لايطول سنينه ... السعاده مع غيرها يمكن ... بس وينه
وان قالو عيني ترتجي شوف عينه ... ماكذبو وربي شاهد فوق السماوات

الصاد صادني بندق غرام برصاصه ... قالو دور لك سويـّـر ولا حصيصه
لاتصير مثل بزر بحفاظه ومصاصه ... امسح دموعك واطلب ربك بدعوات

الضاد ضاق صدري من كل البنات ... مابي نوره ولاكل النورات
عنز امي منيره ولاغيرها عنزات ... تفرج همومي في زمن الضيقات

الطا طبيب بيطري جبته يعالجها ... قال فيها عقده نفساويه تعذبها
رفسته مع كرشته وشفت رفستها ... طار وتعلق في شبك الحوشات

الظا ظلمها هالطبيب المداوي ... العنز رفسته وصار حاله شقاوي
انا الدرعاوي مااجرح بس اداوي ... كل علّه لو زادت فيكم العلات

العين عيني تنثر الدمع الكثير ... بفراقها وش بقا لي وش بيصير
من اشرب حليبه ؟؟ مابي شرب العصير... اشوف حليبها وغيره تراني ضرير
يازين شرب غضارة حليبها حدر السرير ... ترد روحي لو اني في اشد الكربات

الغين غياب حبيبتي بيطوّل ...ماحسبت حساب هاليوم منوّل
جال الحزن في قلبي وتجوّل ... ماتوفيك دموعي لوهي كبر المحيطات

الفا فكرت في غيرك وافكاري محدوده ... لقيت كل الدروب في وجهي مسدوده
ابقعد ثواني ولا سنيــن معدوده .... مدري متى يجيني حبيبً بالغنيمات

القاف قوطي السعاده في وجهي انعفط ... وحبل الامل بعيد عني انصفط
وبمكنسة الاوهام الفرح انشفط ... مكنسة كهربائيه تشفط شفطات

الكاف كفاني عذاب الحزن والفرقى ... الموت يسرق الحبايب سرقى
ابنزل مع الدرج واثرني ارقى ... من الهم تكنبست كل المعلومات

اللام لاتلوموني لو عقبها انتحرت ... ولو السهر يرجعها طول عمري سهرت
ابن فرناس لو انتحرت مثله اشتهرت ... ماقدر وانا خابر انه عظيم المحرمات

الميم مادرو عن اللي في بالي ... وليف ابيه بقلبي بس ماصفالي
الكذب خيبه لو حصل لي ياهنيالي ... وهو اشرف واكرم من كل العنزات

النون نامت عيوني من طول السهر ... وصارت الدقايق بعمري اطول من شهر
لو الفرح عذرا ابقدم لها المهر ... ابي سعاده مع حبيبه مابي حبيبات

الها هويتها اول مادبجت عيني بعينها .... الله على الايام يازين سنينها
مرت في غمضة عين بيني وبينها ... حكم القدر مالنا فيه اعتراضات

الواو ويلي على فراقا وليفي ... يسمونها عنز ويدلعونها خروفي
ابرقص مثل بنت عبده فيفي ... من الهم والاحزان صرنا رقاصات

الياء ياناس مابي اسمع طاريها ... ابنساها ومن اليــوم ناسيها
مهيب نذاله ولاخيانه اداريها ... بس هموم في قلبي اباريها
الله العالم بالامور وخافيها ... والكلام المتكنبس منها اعاديها

الماضي راح وانا لربي اتحمد ... وارجي ثوابه علي يتجدد
وختامها صلو على النبي محمد ... عداد حبات الرمل فالصمان والتنهات
وسلامتكم.......ههههههههه