مقتطفات من الاختبارات

السلام عليكم ورحمه الله وبركاته

بعد خبره كبيره دامت مايقارب 18 سنه في الاختبارات ولله الحمد.... بداية من الابتدائية
والمتوسطة والثانوية ومرورا بالكلية العسكرية ونهاية بجامعة الملك عبدالعزيز

تمكنت من حصر انواع الطلاب في الاختبارات الى اربعة عناصر رئيسية وهي :


الطالب الدافور :


يعشقون الصفوف الاولى بقاعة الاختبار .... ويكرهون الغش والتغشيش ليس من مبدأ
(من غشنا فليس منا) ولكن من مبدأ ( ليش انا اذاكر وهو ياخذها بارد مبرد)
كيف تميزهم؟؟؟؟
اذا دخلت للقاعة وشفت الناس ورا تسولف وتضحك...راح تشوف ناس مرتزين بالصف الاول
لابسين ثياب بدون شمغ ... وشفت كل واحد منهم يحرك فمه (يسمع لنفسه)... فمبروك
لك لقد وجدت ضالتك.
واذا سالته كيف المذاكرة معك يقولك: ياشيخ اسكت بس والله ماذكرت امس كنا سهرانين
في الشاليهات وفله.
وهو نصاب مايطلع من بيته الا يختبر ويرجع ... واذا كان عنده وقت فاضي يدخل النت
عن طريق الدايل اب .. (لأن الدي اس ال يعتبر من الملهيات المحرمه عندهم)
واذا دخل على النت يدخل على الشات ... وشوف عاد نكاتهم ( الزاحف الجبار- مخربها-بايعها بتراب )
واذا ودك تكسب وده قبل الاختبار روح سولف معاه واضحك وقوله والله انك اكبر زاحف
ياشيخ...... راح يعطيك عيونه ويذاكرلك ويغششك


الطالب المنحوس

وهذا الشخص اذا ابتسم للدنيا تفلت الدنيا بوجهه الله يعزكم..... مسيكين وين مايطقها عوجا
يذاكر مذاكره مايذاكرها اكبر دافور ولو سالته يجاوب على طول ( ومدرسين خصوصين وووملخصات ووونماذج وووخرابيط) لكن!!
اذا جات ورقة الاختبار يجيله شلل رعاش والعياذ بالله تلقاه معرق وفاك ازاريره ولايسلم الورقة
الا اخر واحد ونهاية الترم بكل بساطة F
وهذا النوع اذا دخل الشات تكون نكاتهم ( خالد السهران - محمد العاشق _ حسين السعيد)



الطالب الملحوس


وهذا النوع غامض واذا جبت اكبر عتاولة التحليل النفسي يعجزون قدامه.....
بكل بساطه هو شخص يجيب معاه الة حاسبة في اختبار الثقافة الاسلامية..... ودي اوصفه
اكثر بس للاسف غموضه يقف حاجز امامي
وهذا النوع نكاته في الشات ملحوسه مثلهم ( ثلجه مشوية - فحمه مقليه - ببسي تلقيمه)


الطالب ال؟؟؟؟؟

بصراحة هذا النوع عجزت اعطيه وصف وهو مزيج عكسي من النوع الثاني والثالث
هذا النوع يعيش حياته طول بطول وعرض بعرض لايذاكر ولايفتح كتاب ولا يدري وش
اختباره بكره بس درجاته كلها فوق 95!!!
قبل الاختبار بيوم تلقاه سهران بستراحه ولا مقهى وضحك وسوالف للفجر .... وداخل القاعة
لهم اساليب فيزيقيه غريبه في الغش ..... اعطيك مثال !
يكون المراقب واقف يمينه ويساره مافي احد .. تلقا عيونه اليمين ثابته ولاتتحرك وعيونه اليسار في نفس الوقت تتحرك لحالها تلقائيا على ورقه اللي يساره ( سبحان الله) او تلقا عيونه الثنتين
على الورقة وهو يغش من اللي وراه ( كيف؟؟ ماحد يدري) وهؤلاء الطلاب يكونون محور
دراسة لعلم الباراسيكولجي ( علم ماوراء الطبيعه) ويتميزون بعلاقات اجتماعيه ناجحه جدا
ونهايتم غالبا ماتكون في سن صغيره بحادث سياره او بجرعه زائده (الله لا يبلانا)
نكاتهم في الشات محيره وغامضه (مسطره -خلخال- جلسرين)
او اذا كانوا رايقين (سيظل عشقك عالمي- عنفوان الوله- كحلها)


اتمنى اني وفقت في نقل الصوره.......
محبكم
هيلاهوب